ਗਿਆਨ ਸਿੰਘ ਕੋਟਲੀ
ਵੈਨਕੂਵਰ [ਕਨੇਡਾ ]
+1- 604 502 7151
ਸੁਹਣਾ ਸੁਹਣਾ ਸੁਰਗਾਂ ਜੇਹਾ, ਸੁਹਜਾਂ ਦਾ ਭੰਡਾਰ ਕਨੇਡਾ ।
ਰੰਗ ਬਰੰਗੇ ਭਾਂਤ ਭਾਂਤ ਦੇ , `ਫੁੱਲਾਂ` ਦੀ ਗੁਲਜ਼ਾਰ ਕਨੇਡਾ ।
ਬੋਲੀ ਕਿੱਤਾ ਦੇਸ਼ ਧਰਮ, ਰੰਗ ਨਸਲ ਦਾ ਭੇਦ ਨਾ ਕੋਈ,
ਬੰਦੇ ਦਾ ਤਾਂ ਬੰਦਿਆਂ ਵਾਂਗੂੰ, ਹੁੰਦਾ ਹੈ ਸਤਿਕਾਰ ਕਨੇਡਾ ।
ਦੀਨ ਧਰਮ ਤੇ ਸੋਚ ਅਕੀਦੇ, ਆਪਣੇ ਰੰਗੀਂ ਰੰਗੇ ਬੈਠੇ,
ਆਪਣੇ ਰੰਗੀਂ ਵਸਦੇ ਰਸਦੇ, ਸਾਰੇ ਸਭਿਆਚਾਰ ਕਨੇਡਾ ।
ਸੁਹਣੀ ਸੁਹਣੀ ਸੂਰਤ ਏਥੇ, ਪਰੀਆਂ ਵਰਗੀ ਮੂਰਤ ਏਥੇ,
ਨੰਨ੍ਹੇ ਮੁੰਨ੍ਹੇ ਮੁਸਕਣ ਬੱਚੇ, ਲੱਗਦੇ ਫੁੱਲ ਬਹਾਰ ਕਨੇਡਾ ।
ਰਹਿਣ ਸਹਿਣ ਦੀ ਜਾਚ ਸੁਚੇਰੀ, ਲੋਕੀਂ ਸਾਊ ਸ਼ਿਸ਼ਟਾਚਾਰੀ,
ਸਾਰੀ ਦੁਨੀਆਂ ਨੇ ਹੈ ਮੰਨਿਆ, ਦੇਸ਼ਾਂ ਦਾ ਸਰਦਾਰ ਕਨੇਡਾ ।
ਜ਼ੁਲਮ ਤਸ਼ੱਦਦ ਬੇਇਨਸਾਫੀ, ਰਿਸ਼ਵਤ ਦੀ ਕਨਸੋ ਨਾ ਏਥੇ,
ਲੋਕਾਂ ਦੀ ਸੁਣਵਾਈ ਕਰਦੀ, ਸੁਹਣੀ ਹੈ ਸਰਕਾਰ ਕਨੇਡਾ ।
ਪਸ਼ੂਆਂ ਵਾਗੂੰ ਬੰਦੇ ਏਥੇ, ਨਾ ਕੁੱਟੇ ਕੋਹੇ ਮਾਰੇ ਜਾਂਦੇ,
ਦੋਸ਼ੀ ਨਾਲ ਵੀ ਪੁਲਸ ਚੰਗੇਰਾ, ਕਰਦੀ ਹੈ ਵਿਓਹਾਰ ਕਨੇਡਾ ।
ਜੁਰਮਾਂ ਤੇ ਕਾਨੂੰਨ ਦੇ ਏਥੇ , ਫਿਰਦੇ ਨਾ ਫਰਮਾਨ ਵਿਕਾਊ,
ਸੱਚ ਨਿਆਂ ਦੀ ਤੱਕੜੀ ਉ ੱਤੇ, ਹੁੰਦਾ ਹੱਕ ਨਿਤਾਰ ਕਨੇਡਾ ।
ਖੁਲ੍ਹੀ ਧਰਤੀ ਜੰਗਲ ਜੂਹਾਂ, ਕੁਦਰਤ ਦਾ ਅਨਮੋਲ ਖਜ਼ਾਨਾ,
ਸੋਨੇ ਨੂੰ ਵੀ ਮਾਤ ਪਾ ਗਿਆ, ਲੱਕੜੀ ਦਾ ਵਾਪਾਰ ਕਨੇਡਾ ।
ਕੁੱਲ ਦੁਨੀਆਂ ਦੇ ਸੁੰਦਰ ਸੁਪਨੇ, ਕੁੱਲ ਦੁਨੀਆਂ ਦੀਆਂ ਸੁੰਦਰ ਰੀਝਾਂ,
ਕੁਲ ਦੁਨੀਆਂ ਦੇ ਰੰਗਾਂ ਰਲ ਕੇ, ਰਚਿਆ ਹੈ ਸ਼ਾਹਕਾਰ ਕਨੇਡਾ ।
ਸਿਹਤ ਚੰਗੇਰੀ ਉਮਰ ਲੰਬੇਰੀ, ਗਈ ਜੁਆਨੀ ਦਾ ਨਾਂ ਝੋਰਾ,
ਥਾਂ ਥਾਂ ਬੈਠ ਕਲੋਲਾਂ ਕਰਦੇ , ਬੁੱਢੇ ਪੈਨਸ਼ਨਦਾਰ ਕਨੇਡਾ ।
ਛੋਟਾ ਵੱਡਾ ਕੰਮ ਨਾ ਕੋਈ, ਰਾਣਾ ਰੰਕ ਦਾ ਭੇਦ ਨਾ ਕੋਈ,
ਕੀਤੇ ਦਾ ਮੁੱਲ ਪੈਂਦਾ ਯਾਰੋ, ਵਧੀਆ ਹੈ ਕੰਮ ਕਾਰ ਕਨੇਡਾ ।
